Aaj na jane kio man udas hai,aksar udas pal hame bhavukta ki or mod dete hai,bhavukta ateet ki taraf le jati hai or na chahte hue tumhari yaad aa jati hai,kionki mera ateet to tum hi ho,Haa aaj fir beete hue pal meri aankho ke aage chalchitra ki bhanti ghoomne lage hai.

                                                             Tumhe muskarana bahut pasand tha na ,khul ke hans hi kaha pati thi tum,sirf muskrati thi kabhi raseeli muskan, kabhi sajeeli muskan, Tumhe arthi se khol kar jab lakdio par litaya tha maine tab bhi muskaan thi, Aag se ghirne ke baad bhi tumhare chehre ki muskaan wahi raseeli thi,par jab prathanusar maine laathi ko tumhare sir se chuvaya tha jiska matlab aaj se is dunia se saare rishte naate khatam,tab achanak tumhari muskan feeki ho gayi thi,ha wo feekapan maine mehsoos kia tha ,us feeki muskan ne hamari kahani ko ek aise geele kagaj me badal diya jispar likhi na to pichli kahani padi ja sakti hai Or na uspar koi nayi kahani likhi ja sakti hai.

CHIRAG

Frustrated because I can't tell if it's real. Mad because I don't know how you feel. Upset because we can't make it right. Sad because I need you day and night. Angry because you won't take my hand. Aggravated because you don't understand. Disappointed because we can't be together, but still I'll love you forever.

JINDAGI,ACHA SA LAGTA HAI YE SHABD SUNNE ME ,CHOTA SA SHABD PAR KITNA KUCH BHARA HUA HAI ISME,ITNA KUCH SAMAANE KE BAAVJOOD YE SHABD FAT TA KIO NAHI HAI,SHAYAD GUBBARE SE BHI JIADA LACHEELAPAN HAI ISME.JITNA SEEKHA, JITNA KHOYA ,JITNA PAYA  SAB KUCH TO SAMARPIT KAR DIYA ISE OR YE SURSA KE MUH KI TARAH SAB KUCH SAMAHIT KARTA GAYA.PAR YE KIA, YE TO AAJ BHI SAGA NAHI HAI INSAAN KA ,ITNA KUCH DENE KE BAAVJOOD BHI YE BEWAFA MEHBOOBA KI TARAH MUH UTHA KAR SAAMNE SE NIKAL JATA HAI JAISE JANTA BHI NAHI HO,FIR BHI ISSE ITNA LAGAAV KI CHODNE KA SOCHA BHI NAHI JATA ,SHAYAD ISNE HI TO SABKUCH DIYA THA HAME,PAR HAM ISKA DIYA HUA APNA MAAN GAYE OR ISPAR HI BALIDAAN KA EHSAAN DIKHANE LAGE,          

                           TO KIA INSAAN BEWAFA HAI  ??????????

Din Raat daudti jindagi me achanak tumhara khat mila to sab kuch jaise tham sa gaya ,Man ne yakayak fir peeche ki taraf mod le liya,ek khandahar ki deewar ki mahin si darar me aati hui halki si roshni ki laqeer jaisi ek aas jagi jindagi ke prati.Din mahino saalo ki parto me dabe hue pal aankho ke aage sajeev hote gaye.Aaj bhi chat par chintoo patang udata hoga ,dhalti hui sham me jab mai tumhari aankho me dekh kar sab kuch bhool jata tha to pados ki masjid se aati hui ajaan ki awaj tumhara maun todti thi,Der ho gayi ab mai jaati hu,ye hi to bolti thi na tum.

                                    Mai yaha khush hu, nahi tumse jhoot nahi bolunga ,jhooti tassalli dene ke liye bhi nahi.Mere bhoot kaal ke us nirnaya ne mujhe hi bhoot bana diya ,kio hairani ho rahi hai,ek jinda lash hi to ban gaya hu us mod ke baad ,jab tumhari awaaj ye kehte hue suni thi ki Tum apni jimmedari poori karo aaj ke baad ham nahi milenge,sapne me bhi nahi.

                     Jab kuch bhi nahi raha tab bhi march ke sukhe  mahine  me aaya hua tumahara khat seela hua kio hai, kio khat me har agli laqeer ke hashiye faile hue hai.Mera naam likhte hue jo tumhara aansu gira tha wo geelapan abhi tak maujood hai.

                                         Badshah

Kabhi lagta hai ye kal hi ki to baat thi to kabhi jindagi ki dincharya me funs kar yaade bhi dhundli si ho jaati hai,Kitna kuch badal gaya tumhare jaane ke baad yaha tak mera yatharth bhi,  sirf  nahi badla to wo har lamha jise tumhari yaad ke roop me saheja hua hai, Itni baate karne ke baad bhi koi baat reh jaati thi adhoori har baar, Par ham kitni baate karte the sirf chand shabd hi nikalte the tumhare muh se wo bhi tumhare hoton ki thartharahat ko ankho se mehsoos karne me mai sun nahi paata tha,par tumhari ankhe un ankahe bolo ko samjha deti thi.Ek shaher me rehne ke baavjood mahino mahino na milne ke baad bhi koi shikayat nahi hoti thi ekdoosre se,dekho aaj bhi wo rishta kayam hai jo ekdoosre shabd likhne ke baad bhi alag nahi hua.

Saari hakikaton ko khawab kar ke,

Umer bhar ki Khushiyan sarab ker ke,

 Badal gaya hai woh chahton se

 Aadat ko meri Kharab ker ke".

Jindagi me bahut log aaye, kuch jindagi milne ke baad mile kuch ka sath upar wale ne hi mukarrar kar diya tha,jinko ab rishte ke naamo se jaana jata hai,kuch aakar chale gaye kuch judte chale gaye.Par na jaane kio har kisi ke sath ek limitation rahi.

                                                Par jab bhi man ko tatolta hu tab tumhare itne kareeb aane ka karan kya hai to ek baat hi samajh me aati hai ki jo bhi log meri jindagi me aaye wo sab ek adig pahar ki tarah khade rahe jaha tak meri bhavnaye jaati to thi par us pahar ke tale ko chukar laut aati thi, meri bhavnao ka kad unke vishal  kad ke aage bauna pad jaata tha tum  meri jindagi me ek samtal maidan ki tarah aayi jaha meri bhavnao ko chaane ka poora mauka mila shayad tumhari ye masumiyat hi mujhe tumhare itne kareeb le aayi .Us hausale ko shabdo me bayan karna asambhav hai jab Pitaji ki Rasam pagdi wale din mai apne aapko 12 din majboot rakhne ke baad bilakh pada tha wo shayad jindagi ki sabse kamjor ghadi thi jab mere aansoo mere Pita ki yaad ke liye the or saamne wale shayad ye soch rahe the ki mai jimmedari se ghabra gaya hu.Par sabke samne jab tumne mujhe gale lagaya or kitne aatam vishwas ke sath ye kaha ki "ghabra mat mere bete abhi to mai jinda hu".Us Mahin si kaya or jo kaan sirf baate sunkar honth bandh kar lete the usme se jo ye OJASVI shabd nikle unhone mujhe bahut majboot kar diya hai,or meri jindagi ki tarraki ka karan tum hi to ho , sirf tum........................................................... Meri MAA

Meri ek soch hai ki Pyar, Nafrat,Gussa ,Dukh, Khushi  Ye sab kia hai sirf ek Bhavna hi to hai,Or bhavna ki jindagi sirf kuch pal ki hoti hai,Jindagi ko agar ek bajaar ke najariye se dekha jaaye to Jab mai ghar se nikalta hu to khayal sirf office ke kaam or ghar ki chillar po se ghira hota hai man me ye bhavna hoti hai ki aaj ka din kaise fruitful banaya jaaye Par thodi door  gali ke nukkad par ek dukan par chole bhature ban rahe hote hai,na chahte hue bhi unka swad aane lagta hai,kuch door aage chalta hu to do cycle wale jhagad rahe hai pata nahi chole bhature ka swad na jaane kaha chala jata hai or dhian unki taraf khich jata hai or man me bhavna aati hai kia yaar subeh subeh choti si baat par jhagad rahe hai,kuch door chalne par jalebi ki dukan ki raseeli khushboo meri soch ko us taraf mod deti hai.Iska matlab saaf hua ki ek  bhavna ki jindagi kuch pal ki hoti hai thodi der me wo apne aap mar jati hai fir kisi ke chale jaane ka dukh kio ,mar jaane ka shok kio, kisi ke pyaar ke liye soch kio,practicaly mere father jab expire hue tab bahut dukh hua fir bada beta  hone ki vajah se dimaag kriya karam me vyast ho gaya apna dukh chupaya ki Maa ko santavna de paau,fir kai din tak har  choti baat unki badi yaad ban kar aane lagi par samay ke sath sab kuch dhundla hota gaya,ab kisi khushi ya shok ke mauke par yaad rehne lage jo meri is soch ko or majboot karte gaye ki bhavna ki jindagi kuch pal ki hi to hoti hai.

Mujhe Maut se dar nahi lagta,kio lage dar,Aap kia sochte hai maut kia ek baar aati hai jindagi me,Aksar log aisa hi sochte hai, par ek insaan jindagi me kai maut marta hai.Shayad ham sab ne hi ye feel kia hoga jab kisi strict teacher ka period hota tha or us ka hamne home work nahi kia hota ,tab ghanti bajte hi dil ki dhadkan kitni tej ho jaati thi, aisa lagta tha bas aaj sab kuch khatam, ye maut hai or jaise hi wo preriod khatam hota hai ek nai rahat ki saans aati hai wo jindagi hai.

kai baar jeevan me aisi situations aati hai jab aage koi raasta nahi dikhta or hamari aas khatam ho jaati hai ki bas ab sab kuch khatam par jaise hi wo ghadi poori hoti hai sab kuch normal. Par us ghadi ke poora hone ke antral me ham kai maut mar  lete hai. Isliye mujhe maut se dar nahi lagta  kyonki main sochta hoo jab aas choot jaye wo maut hai,par us se ladne ka jazba jindagi hai.